அரசியல் அழுத்தங்களில் இருந்து பொலிஸாரை பாதுகாக்க சர்வதேச அமைப்பு உருவாக்கம்!

இலங்கை பொலிஸ் திணைக்களத்தை அரசியல் அழுத்தங்களில் இருந்து விடுவிப்பதற்கான சர்வதேச அமைப்பொன்று உருவாக்கப்பட்டுள்ளது.
இலங்கை பொலிஸை அரசியலில் இருந்து விடுவிக்கும் சர்வதேச அமைப்பு என அதற்கு பெயரிடப்பட்டுள்ளது. முன்னாள் பொலிஸ் ஊடகப் பேச்சாளர் சிரேஷ்ட பொலிஸ் அத்தியட்சகர் பிரசன்ன ஜயகொடி இந்த அமைப்பின் தலைவராக செயற்படுகிறார்.

இவர் அவுஸ்திரேலியாவில் அரசியல் தஞ்சம் பெற்று வாழ்ந்து வருகிறார்.

இரத்தினபுரி பிராந்தியத்திற்கு பொறுப்பான சிரேஷ்ட பொலிஸ் அத்தியட்சகராக பணியாற்றிய பிரசன்ன ஜயகொடி ஹெரோயின் வியாபாரிகள் மற்றும் அதனுடன் தொடர்புடைய அரசியல்வாதி ஒருவரின் அழுத்தங்கள் மற்றும் அச்சுறுத்தல் காரணமாக நாட்டில் இருந்து வெளியேறி அரசியல் தஞ்சம் பெற்றதாக அப்போது பேசப்பட்டது.

இந்த நிலையில், அரசியல் அழுத்தங்கள் இன்றி சட்டத்தை செயற்படுத்துமாறு அந்த அமைப்பு சகல பொலிஸ் அதிகாரிகளிடமும் கோரிக்கை விடுத்துள்ளது.

சட்டத்தை அமுல்படுத்தும் போது அரசியல்வாதிகளினால் பொலிஸ் அதிகாரிகளுக்கு அநீதி ஏற்பட்டால், அவர்களுக்காக குரல் கொடுப்பதுடன் பாதுகாப்புக்கு உத்தரவாதம் வழங்கப்படும் என அந்த அமைப்பு உறுதியளித்துள்ளது.