சபரிமலை நடை திறக்கப்பட்டது

திருவனந்தபுரம்: சபரிமலையில் நேற்று மாலை 5.30 மணியளவில் சபரிமலை தந்திரி கண்டரர் ராஜுவரர் முன்னிலையில் மேல்சாந்தி தாமோதரன் நம்பூதிரி  நடையை திறந்து ஐயப்பனுக்கு தீபாராதனை நடத்தினார். அப்போது அங்கு குவிந்திருந்த ஏராளமான பக்தர்கள் ‘சுவாமியே சரணம் ஐயப்பா‘ என கோஷங்கள்  எழுப்பினர். நேற்று வேறு சிறப்பு பூஜைகள் நடைபெறவில்லை. இன்று முதல் மே 19ம் தேதி வரை தினமும் கணபதி ஹோமம், உசபூஜை ஆகிய வழக்கமான  பூஜைகளுடன் படிபூஜை, உதயாஸ்தமன பூஜை ஆகிய சிறப்பு பூஜைகள் நடைபெறும். இந்த நாட்களில் தினமும் அதிகாலை 5.30 மணி முதல் காலை 11 மணி  வரை சுவாமிக்கு நெய்யபிஷேகம் நடைபெறும். இந்த பூஜைகள் 19ம் தேதி வரை நடக்கும். அன்றிரவு 10 மணியளவில் நடை சாத்தப்படுகிறது. அன்றுடன்  வைகாசி மாத பூஜை நிறைவடைகிறது. பின்னர் மீண்டும் பிரதிஷ்டை தின பூஜைகளுக்காக 20ம் தேதி மாலை நடை திறக்கப்படும். 21ல் பிரதிஷ்டை தின  பூஜைகள் நடக்கின்றன. அன்றிரவு நடை அடைக்கப்படும்.