திருக்காட்டுப்பள்ளி அக்னீஸ்வரர் கோயிலில் மாசி மக திருவிழா

திருக்காட்டுப்பள்ளி : திருக்காட்டுப்பள்ளி சவுந்தரநாயகி அம்பாள் சமேத ஸ்ரீஅக்னீஸ்வரர் கோயிலில் மாசிமக திருவிழா நடந்தது. திருக்காட்டுப்பள்ளி அக்னீஸ்வரர் கோயிலில் மாசி மகத்தை முன்னிட்டு நேற்று முன்தினம் காலை சுவாமி, அம்பாளுக்கு பால், தயிர், தேன், இளநீர், சந்தனம், பஞ்சாமிர்தம் உள்ளிட்ட பொருட்களால் அபிஷேகம் நடந்தது. பின்னர் சவுந்தரநாயகி அம்பாள் பிறந்த ஊராக கருதப்படும் நாகாச்சி கிராம மக்கள் தங்கள் கிராமத்திற்கு நாதஸ்வர கச்சேரியுடன் அழைத்து சென்றனர்.

நாகாச்சியில் இரவு தங்கிய சுவாமி, அம்பாளுக்கு சிறப்பு அபிஷேக, அலங்கார ஆராதனைகள், நாதஸ்வர கச்சேரி நடந்தது. பின்னர் நேற்று காலை சுவாமி, அம்பாளுக்கு சிறப்பு அலங்காரம் செய்து மாப்பிள்ளைக்கு (சுவாமிக்கு) பெண்வீட்டார் கட்டு சோறு கட்டி கொடுத்து திருக்காட்டுப்பள்ளி கோயிலுக்கு அனுப்பி வைத்தனர். இந்நிகழ்ச்சியில் நாகாச்சி மக்கள் திரளாக கலந்து கொண்டனர்.