ஆளும் கட்சி அமைச்சர்கள் பங்கேற்காத காரணத்தினால் செய்தியாளர் சந்திப்பு ரத்து

ஆளும் கட்சியின் அமைச்சர்கள் பங்கேற்காத காரணத்தினால் செய்தியாளர் சந்திப்பு ரத்து செய்யப்பட்டுள்ள சம்பவம் கொழும்பில் நேற்று நடைபெற்றுள்ளது.
ஐக்கிய மக்கள் சுதந்திரக் கூட்டமைப்பின் செய்தியாளர் சந்திப்பொன்று நேற்று கொழும்பில் நடத்தப்படவிருந்தது. எனினும் ஸ்ரீலங்கா சுதந்திரக் கட்சியின் அமைச்சர்கள் எவரும் பங்கேற்காத காரணத்தினால் இறுதி நேரத்தில் ரத்து செய்யப்பட்டது.

கம்யூனிஸ்ட் கட்சியின் பொதுச் செயலாளர் டியூ. குணசேகர மற்றும் தேசிய சுதந்திர முன்னணியின் ஊடகச் செயலாளர் முஸம்மில் ஆகியோர் செய்தியாளர் சந்திப்பில் பங்கேற்றிருந்தனர்.

முற்பகல் 11.30 செய்தியாளர் சந்திப்பு நடத்தப்படவிருந்த போதிலும், அமைச்சர் சுசில் பிரேமஜயந்த 12.30 வரையில் செய்தியாளர் சந்திப்பில் பங்கேற்கவில்லை.

அதன் பின்னர் அமைச்சர் டலஸ் அழகப்பெருமவை செய்தியாளர் சந்திப்பிற்கு அழைத்து வர எடுக்கப்பட்ட முயற்சியும் தோல்வியடைந்தது.

சுதந்திரக் கட்சியின் உறுப்பினர்கள் இல்லாத காரணத்தினால் ஆளும் கட்சியின் செய்தியாளர் சந்திப்பினை ரத்து செய்ய நேரிட்டது.

ஜனாதிபதி தேர்தல் நடைபெறவுள்ள நிலையில் செய்தியாளர் சந்திப்பு ஒன்றை நடத்த கட்சி உறுப்பினர்கள் இல்லாத காரணத்தினால், சந்திப்பு ரத்து செய்யப்பட்டமை எதிர்க்கட்சிகளின் விமர்சனத்திற்கு உள்ளாகியுள்ளது.