மசினியம்மன் கோவில் திருவிழா: திரளான பக்தர்கள் பங்கேற்பு

மசினகுடியில் உள்ள புகழ் பெற்ற மசினியம்மன் கோவிலில் ஒவ்வொரு ஆண்டும் ஆயுத பூஜையை முன்னிட்டு தசரா பண்டிகை கொண்டாடுவது வழக்கம்.

இந்த ஆண்டிற்கான பண்டிகை கடந்த 24–ந் தேதி கொடியேற்றத்துடன் தொடங்கியது. பின்னர் மாயாரில் உள்ள சிக்கம்மனை மசினகுடிக்கு அழைத்து வந்து கொலுவேற்றுதல் நிகழ்ச்சி நடைபெற்றது.

இதனை தொடர்ந்து கடந்த 25–ந் தேதி முதல் தினந்தோறும் அம்மனுக்கு பல்வேறு பூஜைகளும், தீபாராதனைகளும் நடைபெற்றன.

திருவிழாவின் முக்கிய நிகழ்ச்சியான தேர்த்திருவிழா நடைபெற்றது. இரவு 9 மணியளவில் மசினியம்மனுக்கு சிறப்பு அலங்காரம் செய்யப்பட்டு தேரில் ஊர்வலமாக அழைத்து வரும் நிகழ்ச்சி நடைபெற்றது.

தேர் ஊர்வலம் கோவில் வளாகத்தில் தொடங்கி மசினகுடி பஸ் நிலையம், விநாயகர் கோவில் தெரு, மின்வாரிய குடியிருப்பு, மசினகுடி முக்கிய வீதிகள் வழியாக மீண்டும் கோவிலுக்கு வந்தது.

முன்னதாக அம்பு எய்தல் நிகழ்ச்சி நடைபெற்றது. இதையடுத்து முளைப்பாரி எடுத்து வருதல் மற்றும் மாவிளக்கு பூஜையும் நடைபெற்றது. இதில் திரளான பக்தர்கள் கலந்து கொண்டனர். பின்னர் பக்தர்களுக்கு அன்னதானம் வழங்கப்பட்டது.

இந்த நிலையில் சிக்கம்மனை மீண்டும் மாயாருக்கு வழியனுப்புதல் நிகழ்ச்சி நடை பெற்றது. இதற்கான ஏற்பாடுகளை மசினியம்மன் மற்றும் துர்க்கையம்மன் கோவில் கமிட்டியினர் செய்திருந்தனர்.

திருவிழாவை முன்னிட்டு மசினகுடி போலீசார் பாதுகாப்பு பணியில் ஈடுபட்டு இருந்தனர்.