திருக்கழுக்குன்றம் வேதகிரீஸ்வரர் கோயிலில் கும்பாபிஷேகம் கோலாகலம்

சென்னை: திருக்கழுக்குன்றம் வேதகிரீஸ்வரர் கோயிலில் கும்பாபிஷேகம் நேற்று கோலாகலமாக நடந்தது. 50 ஆயிரத்துக்கும் மேற்பட்ட பக்தர்கள் திரண்டு சாமி தரிசனம் செய்தனர். திருக்கழுக்குன்றம் மலையில் பிரசித்தி பெற்ற வேதகிரீஸ்வரர் கோயில், கீழே பக்தவச்சலேஸ்வரர் கோயில் உள்ளது. 4 ராஜகோபுரம், ரிஷிகோபுரம் உள்ளன. இங்குள்ள குளத்தில் 12 ஆண்டுக்கு ஒருமுறை சங்கு பிறப்பதால், அதை சங்கு தீர்த்த குளம் என்று அழைக்கின்றனர். இத்தகைய சிறப்புமிக்க இந்த கோயில் ரூ.2 கோடி மதிப்பில் திருப்பணி செய்து சீரமைக்கப்பட்டது. நேற்று காலை 9.15 மணிக்கு கோபுர கலசங்களுக்கு சிவாச்சாரியார்கள் புனிதநீர் தெளித்து கும்பாபிஷேகம் செய்தனர்.

கோயிலில் திரண்டு இருந்த ஆயிரக்கணக்கான பக்தர்கள் மீதும் புனிதநீர் தெளித்தனர். பக்தர்கள் பக்தி பரவசத்துடன் சாமி தரிசனம் செய்தனர். கலெக்டர் சித்திரசேனன், தண்டரை மனோகரன் எம்எல்ஏ, செய்யூர் ராஜி எம்எல்ஏ, ஒன்றியக்குழு தலைவர் புஷ்பாஆறுமுகம், இந்து அறநிலையத்துறை ஆணையர் தனபால், இணை ஆணையர் ராஜா மற்றும் அதிகாரிகள் கும்பாபிஷேகத்தில் பங்கேற்றனர். சென்னை, காஞ்சிபுரம், திருவள்ளூர், வேலூர் மற்றும் பல்வேறு இடங்களில் இருந்து 50 ஆயிரத்துக்கும் மேற்பட்ட பக்தர்கள் வந்து இருந்தனர். அவர்களுக்கு அன்னதானம், நீர்மோர் வழங்கப்பட்டது. பக்தர்களின் வசதிக்காக சிறப்பு பஸ்கள் இயக்கப்பட்டன. எஸ்.பி. விஜயகுமார் தலைமையில் போலீசார் பாதுகாப்பு ஏற்பாடுகளை செய்தனர்.