திருமண தடை, உடல் உபாதை நீக்கும் வேலாத்தம்மன்

உங்க ஏரியா கோயில்

ராயப்பேட்டை பெருமாள் முதலி சாலையில் இரண்டாயிரம் ஆண்டுகள் பழமை வாய்ந்த வேலாத்தம்மன் கோயில் உள்ளது. இக்கோயிலின் உள்ளே வேலாத்தம்மனோடு, துர்கை, முருகன், விநாயகர், பிரத்யங்கரா தேவி, மதுரைவீரன், கால பைரவர், பால் முனிஸ்வரர் உட்பட பல தெய்வங்களுக்கும் இங்கு சன்னதி இருக்கின்றன. ராயப்பேட்டை மட்டுமன்றி, சுற்றுவட்டாரப் பகுதிகளான பாலாஜி நகர், மயிலாப்பூர், அண்ணாசாலை போன்ற பகுதிகளிலிருந்தும் ஏராளமான பக்தர்கள் தினமும் இங்கு வந்து வழிப்பட்டு செல்கின்றனர்.

கோயிலின் தலமரம்: இந்த திருத்தலத்தின் தலமரமாக அரச மரம் மற்றும் வேப்ப மரம் அமைந்துள்ளன. இவை ஓரே பீடத்தில் பின்னிபிணைந்து காணப்படுகின்றன. பல காலமாக திருமணம் கைகூடாமல் இருப்பவர்கள் இந்த தல விருட்சத்தில் மஞ்சள் கோர்க்கப்பட்ட கயிறைக்கட்டி அம்மனை வழிபட திருமண தடைநீங்கும் எனபது ஐதீகம். அதோடு மட்டுமல்லாமல், தன்னை வேண்டிக்கொண்டு ஆறு வாரங்கள் விரதம் இருந்து மாவிளக்கு ஏற்றி வழிபடுபவர்களின் வயிற்றுவலி போன்ற உடல் உபாதைகளையும் இக்கடவுள் நீக்குவதாக நம்பப்படுகிறது.

எப்படி செல்வது? மந்தைவெளியில் இருந்து மாநகரப் பேருந்து எண் 21, திருவான்மீயூரில் இருந்து ஏ1, தியாகராய நகரில் இருந்து 13, 13ஏ ஆகிய மாநகரப் பேருந்துகளில் பயணித்து ராயப்பேட்டை அரசு பொது மருத்துவமனை பேருந்து நிறுத்தத்தில் இறங்கி கோயிலை அடையலாம்.