மீனாட்சி அம்மன் கோயிலில் ஆடி முளைக்கொட்டு விழா

மதுரை: மதுரை மீனாட்சி அம்மன் கோயி லில் ஆடி முளைக்கொட்டு விழா நேற்று கொடியேற்றத்துடன் துவங்கியது. மதுரை மீனாட்சி சுந்தரேஸ்வரர் கோயிலில் அம்மனுக்காக பிரத்யேகமாக நடைபெறும் விழாக்களில் ஒன்று ஆடி முளைக்கொட்டு விழா. விழாவிற்கான கொடியேற்றம் நேற்று அம்மன் சன்னதி ஆறுகால் பீடத்தில் காலை 9 மணிக்கு மேல் நடைபெற்றது. மேள, தாளங்கள் ஒலிக்க வேத, மந்திரங்கள் முழங்க கொடியேற்றம் நடைபெற்றது.

தொடர்ந்து தீபாராதனை நடைபெற்றது. இந்நிகழ்ச்சியில் கோயில் இணை ஆணையர் ஜெயராமன் உட்பட திரளான பக்தர்கள் கலந்து கொண்டனர். விழா நாட்களில் காலை, மாலை இரண்டு வேளையும் அம்மன் கோயிலுக்குள் ஆடி வீதிகளில் உலா வந்து பக்தர்களுக்கு காட்சி அளிக்கிறார். இரவில் அம்மன் சிம்ம வாகனம், அன்ன வாகனம், காமதேனு, குதிரை, ரிஷபம் என ஒவ்வொரு வாகனங்களில் எழுந்தருளி வலம் வருகிறார்.

ஜூலை 17 அன்று இரவு புஷ்பப் பல்லக்கில் அம்மன் ஆடி வீதிகளில் வலம் வருவார். அதன் பின்னர் உற்சவர் சன்னதியில் அம்மன், சுவாமி மாலை மாற்றும் நிகழ்ச்சி நடைபெறும். ஜூலை 19 காலை 9.35 மணிக்கு மேல் மீனாட்சி அம்மன் சட்டத்தேரில் எழுந்தருளி சித்திரை வீதிகளில் வலம் வருவார். அன்று இரவு 7 மணிக்கு ஆடி வீதிகளில் புஷ்ப விமானத்தில் வலம் வருகிறார். இறுதி நாளான ஜூலை 20 அன்று இரவு கன தண்டியலில் சயனக் கோலத்தில் வருவது சிறப்பம்சமாகும்.