மைத்திரியை ஆதரித்து கல்குடாவில் கூட்டம்! பெருந்திரளான மக்கள் பங்கேற்பு!

எதிர்வரும் ஜனாதிபதித் தேர்தலில் எதிர்க் கட்சிகளின் பொது வேட்பாளராக களமிறக்கப்பட்டுள்ள மைத்திரிபால சிறிசேனவை ஆதரிக்கும் முகமாக புதன்கிழமை மாலை கல்குடாவில் இடம்பெற்ற பொதுக்கூட்டத்தில் பெருந்திரளான மக்கள் கலந்து கொண்டனர்.

வாழைச்சேனை பழைய வெலிங்டன் தியட்டருக்கு முன்பால் இடம்பெற்ற இப்பொதுக்கூட்டத்தில் மத்திய மாகாண சபை உறுப்பினர் அஸாத் ஸாலி பொது வேட்பாளர் மைத்திரிபாலவின் சகோதரர் டட்லிசிறிசேன ஆகியோர் உட்பட உள்ளூர் பேச்சாளர்களும் கலந்து கொண்டனர்.

பரந்தளவிலான முன் அறிவித்தல்கள் வழங்கப்பட்ட நிலையில் பெருந்திரளான மக்கள் கலந்து கொண்டதாக எமது செய்தியாளர் தெரிவிக்கிறார்.

மேலும் இக்கூட்டத்தில் உரையாற்றிய பொது வேட்பாளரின் சகோதரர் டட்லிசிறிசேன பொலன்னறுவை மாவட்டம் எப்போதும் கல்குடா மக்களை ஆதரிக்கும் மாவட்டமாக இருந்து வருவதாகவும், அதிலும் முக்கியமாக கல்குடா மக்களுக்கும் மைத்திரிபால குடும்பத்துக்கும் மிக நீண்டகாலமாக வியாபாரதுறையில் நட்பு இருந்து வருவதாகவும் அதனை யாராலும் எப்போதும் பிரிக்க முடியாதென்றும், பொது வேட்பாளரின் வெற்றியானது இக்கூட்டத்துக்கு கல்குடா மக்கள் திரண்டு வருகை தந்திருப்பதனை பார்க்கும் போது உறுதி செய்யப்பட்ட வெற்றியாக இருப்பதோடு, கல்குடா மக்கள் எனது சகோதரரான மைத்திரிபால மீது வைத்திருக்கும் மரியாதையை எடுத்துக்காட்டுவதாகவே இருக்கின்றது என தெரிவித்தார்.

இப்பொதுக்கூட்டத்தில் மாகாண சபை உறுப்பினர் அஸாத் ஸாலி உட்பட பலர் உரையாற்றியமை குறிப்பிடத்தக்கது.