ஜனாதிபதித் தேர்தலுக்கு பின் லங்கா சமசமாஜக் கட்சியில் பிளவு ஏற்படலாம்

எதிர்வரும் ஜனவரி 8 ஆம் திகதிக்கு பின்னர் லங்கா சமசமாஜக் கட்சியின் தலைமைத்துவத்தில் கட்டாயம் மாற்றம் ஏற்படும் என அந்த கட்சியின் சிரேஷ்ட உறுப்பினர்கள் சுட்டிக்காட்டியுள்ளனர்.
கட்சியின் இன்றைய தலைவர்கள் பல வருடங்களாக தமது பதவிகளை பாதுகாக்க நடவடிக்கை எடுத்தனரே தவிர நாட்டின் விவசாயிகள், தொழிலாளிகள், மீனவர்கள் உட்பட உழைக்கும் மக்களுக்காக எந்த சேவையையும் செய்யவில்லை என கட்சியின் பிரதான பொருளாளர் கீர்த்தி காரியவசம் தெரிவித்துள்ளார்.

லங்கா சமசமாஜக் கட்சியின் பொதுச் செயலாளரான சிரேஷ்ட அமைச்சர் திஸ்ஸ விதாரண உட்பட அதன் தலைவர்கள் கட்சியின் மத்திய செயற்குழுவை தமது தனிப்பட்ட நிகழ்ச்சி நிரலுக்கு ஏற்ப வழி நடத்தி தமது அமைச்சு பதவிகளையும் தலைமைத்துவ பதவிகளையும் பாதுகாத்து வருகின்றனர்.

கட்சியின் பெரும்பான்மையான உறுப்பினர்களின் கருத்துக்கு செவி மடுக்காது இவர்கள் செயற்படுவதால், பொது வேட்பாளருக்கு ஆதரவளிக்க பெரும்பாலான உறுப்பினர்கள் தீர்மானித்துள்ளனர்.

இதனால், ஜனாதிபதித் தேர்தலுக்கு பின்னர் கட்சியின் பெரும்பான்மை உறுப்பினர்களை பிரதிநிதித்துவம் செய்யும் தலைவர் உருவாகுவதை தடுக்க முடியாது எனவும் காரியவசம் கூறியுள்ளார்.