திருச்சானூர் பிரம்மோற்சவம் : 5வது நாள் கஜ வாகனத்தில் பத்மாவதி தாயார் பவனி

திருப்பதி: திருப்பதி அடுத்த திருச்சானூர் பத்மாவதி தாயார் கோயில் பிரம்மோற்சவம் கடந்த 29ம் தேதி கொடியேற்றத்துடன் தொடங்கியது. 4வது நாளான நேற்று முன்தினம் இரவு அனுமந்த வாகன உற்சவம் நடந்தது. ஐந்தாவது நாளான நேற்று காலை பல்லக்கு உற்சவத்தில் பத்மாவதி தாயார் மாடவீதியில் பவனி வந்தார். அப்போது, அங்கு திரண்டிருந்த பக்தர்கள் தீபம் ஏற்றி வழிபட்டனர். பிற்பகல் 3 மணியளவில், சிறப்பு அலங்காரத்தில் உற்சவ மூர்த்தியை திருச்சானூர் வீதிகளில் கொண்டு சென்றபோது, பக்தர்கள் ஒருவர் மீது ஒருவர் மஞ்சள் நீரை தெளித்துக் கொண்டு வசந்த உற்சவத்தை கொண்டாடினர்.

இரவில் கஜ வாகனத்தில் வந்த உற்சவமூர்த்திக்கு திருப்பதி கோயில் மூலவரின் காசு மாலை அலங்கரிக்கப்பட்டது. இதையடுத்து, லட்சுமிதேவி அலங்காரத்தில் பத்மாவதி தாயார் மாடவீதிகளில் பவனி வந்து பக்தர்களுக்கு அருள்பாலித்தார். இன்று காலை சர்வபூபால வாகனத்திலும், மாலை தங்கத் தேரிலும், இரவு கருட வாகனத்திலும் பத்மாவதி தாயார் வீதி உலா வருகிறார். ஏராளமான பக்தர்கள் திருச்சானூர் வருவதால் சிறப்பு பஸ்கள் இயக்கப்படுகிறது.