அருணாசலேஸ்வரர் கோவிலில் கார்த்திகை தீபவிழா பந்தக்கால் முகூர்த்தம் 6-ந் தேதி நடக்கிறது

திருவண்ணாமலை அருணாசலேஸ்வரர் கோவிலில் கார்த்திகை தீபதிருவிழா பந்தல்கால் முகூர்த்தம் வருகிற 6-ந் தேதி நடக்கிறது. திருவண்ணாமலை அருணாசலேஸ்வரர் கோவிலில் நடைபெறும் கார்த்திகை தீப திருவிழா கொடியேற்றத்துடன் தொடங்கி 10 நாட்கள் நடைபெறும்.

10-வது நாள் காலையில் கோவில் வளாகத்தில் பரணிதீபமும், மாலையில் மலை மீது மகாதீபமும் ஏற்றப்படும். இவ்விழாவை காண 15 லட்சத்திற்கும் மேற்பட்ட பக்தர்கள் கலந்து கொள்வார்கள். தீபதிருவிழா நாட்களில் ஒவ்வொரு நாளும் காலை மற்றும் இரவு வேளைகளில் பல்வேறு வாகனங்களில் சாமி-அம்மன் வீதிஉலா வருவார்கள்.

ஒவ்வொரு ஆண்டும் கார்த்திகை தீபதிருவிழா தொடங்குவதற்கு முன்பு கோவிலில் வாகனங்கள் புதுப்பித்தல், பழுது பார்த்தல் அழைப்பிதழ் அச்சிடுதல், வர்ணம் பூசுதல் போன்ற பல்வேறு பணிகள் செய்யப்படும். இதற்கு முன்னதாக கார்த்திகைதீப பந்தக்கால் நடப்படும்.

அதன்படி இந்த ஆண்டு கார்த்திகை தீப திருவிழாவை முன்னிட்டு வருகிற 6-ந் தேதி (திங்கட்கிழமை) அதிகாலை 5.30 மணிக்கு மேல் 6.45 மணிக்குள் பந்தக்கால் மூகூர்த்தம் நடக்கிறது. இதற்கான ஏற்பாடுகளை கோவில் இணை ஆணையர் செந்தில்வேலவன் மற்றும் ஊழியர்கள் செய்து வருகின்றனர்.