இன்று ஆழ்வார் திருமஞ்சனம்: திருப்பதி கோவிலில் 6 மணி நேரம் தரிசனம் ரத்து

by oviya Sat Dec 06, 2014 10:42 am

திருப்பதி ஏழுமலையான் கோவிலில் வருகிற 26–ந் தேதி வருடாந்திர பிரமோற்சவம் நடக்கிறது.

அதற்கு முன்னதாக கோவிலை தூய்மைபடுத்தும் வகையில் கோவில் ஆழ்வார் திருமஞ்சனம் நடப்பது வழக்கம்.

அதன்படி இன்று காலை கோவிலில் ஆழ்வார் திருமஞ்சனம் நடந்தது. ஏழுமலையான் கருவறை முதல் ராஜகோபுரம் வரை சுத்தம் செய்யப்பட்டது.

இதனால் காலை 6 மணி முதல் மதியம் 12 மணி வரை பக்தர்கள் தரிசனத்தை தேவஸ்தானம் ரத்து செய்தது. சுப்ரபாதம், தோமாலை சேவைகள் மட்டும் ஏழுமலையானுக்கு தனிமையில் நடந்தது.

12 மணிக்கு பிறகு பக்தர்கள் தரிசனத்துக்கு அனுமதிக்கப்பட்டனர்.

பிரம்மோற்சவத்தை யொட்டி வருகிற 25–ந் தேதி அங்குரார்பணம் நடக்கிறது. மறுநாள் (26–ந் தேதி) கொடியேற்றத்துடன் பிரமோற்சவம் தொடங்குகிறது.

அக்டோபர் 4–ந் தேதி வரை விழா நடைபெறுகிறது. முக்கிய நிகழ்வான கருட சேவை 30–ந் தேதி நடைபெறுகிறது.

விழா நாட்களில் முதியோர், ஊனமுற்றோருக்கான நேரடி தரிசனம் ரத்து செய்யப்படுகிறது.

பிரமோற்சவத்தையொட்டி கோவில் மின் விளக்குகளால் அலங்காரம் செய்யப்பட்டு உள்ளது. மேலும் மலர் அலங்காரமும் செய்யப்படுகிறது.

இந்த முறை வித்தியாசமாக ஏழுமலையான் அவதாரத்தை சித்தரிக்கும் வகையில் மணல் சிற்பமும் அமைக்கப்பட்டுள்ளது.

பெங்களூரைச் சேர்ந்த சகோதரிகள் கவுரி, நீலாம்பரி அமைத்துள்ள லட்சுமி வராக அவதார சிற்பம் கவரும் வண்ணம் உள்ளது.

7 டன் மணல் கொண்டு இதனை அவர்கள் அமைத்து உள்ளனர்.