ஆடி கிருத்திகை விழா இன்று தெப்ப உற்சவம் : காவடிகளுடன் பக்தர்கள் திரண்டனர்

திருத்தணி: ஆடி கிருத்திகையை முன்னிட்டு இன்று தெப்ப திருவிழா நடக்கிறது. திருத்தணி முருகன் கோயிலில் நேற்று காலை ஆடி பரணி விழா நடந்தது. இதையொட்டி சுவாமிக்கு சிறப்பு அபிஷேகம், சிறப்பு பூஜைகள் செய்யப்பட்டன. உற்சவருக்கு வைர கிரீடமும், பச்சை பட்டு உடுத்தி தங்க கவசமும் அணிவிக்கப்பட்டு இருந்தது. அதிகாலையிலேயே ஆயிரக்கணக்கான பக்தர்கள் குவிந்தனர். தமிழகம் மற்றும் பிற மாநிலங்களில் இருந்து வந்த பக்தர்கள் பால் காவடி, பன்னீர், புஷ்ப காவடி, மயில் காவடி என பல காவடிகளை சுமந்து வந்தனர். ஏராளமான பக்தர்கள் வரிசையில் நின்று முருகனை வழிபட்டனர்.

அரோகரா, அரோகரா என பக்தி பரவசத்துடன் முழக்கமிட்டும், முருகனை பாடியும் மலையேறி வந்து சாமி தரிசனம் செய்தனர். விழாவையொட்டி கோயில் பல வண்ண மலர்களால் அலங்கரிக்கப்பட்டிருந்தது. பக்தர்களுக்கு பிரசாதம் வழங்கப்பட்டது. இன்று ஆடி கிருத்திகை விழாவை முன்னிட்டு முருகனுக்கு பல்வேறு சிறப்பு அபிஷேகம் செய்யப்படுகிறது. பழனி தண்டாயுதபாணி முருகன் கோயில், திருப்பதி வெங்கடாசலபதி கோயிலில் இருந்து சீர்வரிசை பொருட்கள் கொண்டு வந்து முருகனுக்கு அலங்காரம் செய்யப்படுகிறது. மாலை 7 மணிக்கு முதல் நாள் தெப்ப உற்சவம் நடக்கிறது. இதில் முருகன், 3 முறை தெப்பத்தை வலம் வந்து பக்தர்களுக்கு அருள் பாலிப்பார்.