திருப்பதி கோயிலில் புதிய ஸ்ரீவாரி பாதம் இன்று பிரதிஷ்டை

திருமலை: திருமலையில் புதிய ஸ்ரீவாரி பாதம் இன்று பிரதிஷ்டை செய்யப்படுகிறது. திருப்பதி ஏழுமலையான் கோயிலில் இருந்து 7 கிலோ மீட்டர் தொலைவில் ஸ்ரீ வாரி பாதம் உள்ளது. இதில் கால் விரல் சேதமானது கடந்த இரண்டு வாரங்களுக்கு முன் கண்டுபிடிக்கப்பட்டது. இதனால் பக்தர்கள் வேதனை அடைந்தனர். இதையடுத்து ஸ்ரீவாரி பாதம் புதிதாக வைக்க ஏற்பாடு செய்யப்பட்டது. இதுகுறித்து இணை செயல் அலுவலர் சீனிவாசராஜூ நேற்று அளித்த பேட்டி: வெங்கடேச பெருமாள் பூலோகத்துக்கு வந்தபோது அவரது பாதம் பட்ட இடம் திருப்பதி ஏழுமலையான் கோயில் அருகே உள்ளது என்று பக்தர்கள் கருதினர்.

இதனால் அந்த இடத்தில் அனைத்து பக்தர்களும் தரிசிக்கும் வகையில் 1983ம் ஆண்டு அப்போதைய தலைமை செயல் அலுவலர் உத்தரவுப்படி தேவஸ்தான ஸ்தபதி லட்சுமி நாராயணா மற்றும் அதிகாரிகள் ஸ்ரீ வாரி பாதத்தை அமைத்தனர். அந்த பாதத்தில் பக்தர்கள் தொடர்ந்து தரிசனம் செய்து தொட்டு வணங்கி வருகின்றனர். இதில் கடந்த இரண்டு வாரங்களுக்கு முன் இந்த ஸ்ரீவாரி பாதம் உடைந்தது. எனவே ஏற்கனவே ஸ்ரீ வாரி பாதத்தை செய்த ஸ்தபதி தேவஸ்தானத்தில் தற்போதும் பணி புரிந்து வருகிறார்.

அவர் மூலம் புதிய பாதம் செய்யப்பட்டுள்ளது. இந்த பாதம் நாளை(இன்று) காலை 6 மணி முதல் 7.30 மணிக்குள் சிறப்பு பூஜைகள் செய்து பிரதிஷ்டை செய்யப்படும். தற்போது வைக்கப்படும் பாதத்தை பக்தர்கள் தொட வேண்டிய அவசியம் இல்லை. பார்த்து சென்றாலே போதும் என மூத்த அர்ச்சகர்கள் தெரிவித்தனர். இந்த பாதத்திற்கு இன்னும் 2 வாரங்களுக்குள் உடையாத கண்ணாடி பாதுகாப்பு கவசம் அணிவிக்கப்படும். அதுவரை உரிய பாதுகாப்பு அளிக்கப்படும். ஸ்ரீவாரி பாதம் பிரதிஷ்டை செய்யப்படுவதால் தற்போதுள்ள இடத்திற்கு நாளை(இன்று) பிரதிஷ்டை செய்யப்படும் வரை பக்தர்கள் செல்ல அனுமதி இல்லை என்றார். பிரதான அர்ச்சகர் ரமணதீட்சதலு, துணை செயல் அலுவலர் சின்னங்காருரமணா, கோயில் சிறப்பு அலுவலர் டாலர் சேஷாத்திரி உள்ளிட்டோர் இருந்தனர்.