இன்று ஆடி 3வது வெள்ளி மணப்பாக்கம் கன்னி கோயிலில் பக்தர்கள் கூட்டம் அலைமோதியது

செங்கல்பட்டு: இன்று ஆடி 3வது வெள்ளியை முன்னிட்டு மணப்பாக்கம் கன்னியம்மன் கோயிலில் தீமிதி விழா நடக்கிறது. ஏராளமான பக்தர்கள் தீமிதிக்க உள்ளனர். செங்கல்பட்டு அடுத்த மணப்பாக்கம் கிராமத்தில் புகழ்பெற்ற கன்னியம்மன் கோயில் உள்ளது. பாலாற்றங்கரையில் அமைந்துள்ள இந்த கோயிலுக்கு ஒவ்வொரு வெள்ளிக்கிழமையும் ஏராளமான பக்தர்கள் வருகை தந்து மொட்டை அடித்து, காது குத்தி, கிடா வெட்டி நேர்த்தி கடனை செலுத்துவார்கள்.
இன்று 3வது ஆடி வெள்ளியை முன்னிட்டு இன்று காலை முதல் பக்தர்கள் கூட்டம் கூட்டமாக கோயிலுக்கு வந்தனர்.

இன்று தீ மிதி திருவிழா நடக்கிறது. ஆயிரக்கணக்கான பக்தர்கள் காப்பு கட்டி விரதம் இருந்து தீ மிதிக்க தயாராக உள்ளனர். இதற்காக தீக்குண்டம் வளர்க்கப்பட்டுள்ளது. சென்னை, காஞ்சிபுரம், திருவள்ளூர், விழுப்புரம் மற்றும் அண்டை மாநிலங்களான புதுச்சேரி, ஆந்திரா, கர்நாடகா உள்ளிட்ட பகுதிகளில் இருந்து பல்லாயிரக்கணக்கானோர் மாட்டு வண்டி, கார், லாரி, பஸ்களில் வருகை தந்துள்ளனர். இதற்காக செங்கல்பட்டு டிஎஸ்பி குமார் தலைமையில் 200 போலீசார் பாதுகாப்பு பணியில் ஈடுபடுத்தப்பட்டுள்ளனர்.