திருத்தணி முருகன் கோவிலில் கந்தசஷ்டி விழா தொடங்கியது

திருத்தணி சுப்பிரமணிய சுவாமி கோயிலில் கந்தசஷ்டி விழா இன்று தொடங்கியது. விழாவை முன்னிட்டு இன்று காலை 10 மணியளவில் மூலவர் கடவுளுக்கு சிறப்பு அபிஷேகம் நடத்தி புஷ்ப அலங்காரம் செய்யப்பட்டது.

நாளை (சனிக்கிழமை) பட்டு அலங்காரம், மறுநாள் (ஞாயிற்றுக்கிழமை) தங்ககவச அலங்காரம், 27-ந் தேதி திருவாபரண அலங்காரம், 28-ந் தேதி வெள்ளி கவச அலங்காரம், 29-ந் தேதி சந்தன காப்பு அலங்காரங்களில் முருகப்பெருமான் பக்தர்களுக்கு காட்சி அளிக்கிறார்.

தினசரி சண்முகர் கடவுளுக்கு லட்சார்ச்சனையும் நடைபெற்ற வண்ணம் உள்ளன. மாலை 6 மணிக்கு புஷ்பாஞ்சலி நடக்கிறது. 30-ந் தேதி காலை 11 மணிக்கு கல்யாண உற்சவருக்கு திருக்கல்யாணம் நடைபெற உள்ளது. இவ்விழாவில், மலைக்கோயில் வளாக மண்டபத்தில் தினசரி சமய சொற் பொழிவும், பக்தி இன்னிசை கச்சேரிகள், பரதநாட்டிய நிகழ்ச்சிகள் நடைபெற உள்ளன.

கந்தசஷ்டி முன்னிட்டு பக்தர்கள் சஷ்டி விரதம் தொடங்கி முருகனை வழிபட்டு வருகின்றனர். விழா ஏற்பாடுகளை கோயில் தக்கார் வே.ஜெய சங்கர், இணை ஆனையர் நா.புகழேந்தி மற்றும் கோயில் அதிகாரிகள் செய்து வருகின்றனர்.