கன்னியாகுமரியில் பகவதி அம்மனுக்கு ஓணப்பட்டு உடுத்தி சிறப்பு அபிஷேகம்–வழிபாடு

கன்னியாகுமரியில் உள்ள புகழ் பெற்ற பகவதி அம்மன் கோவிலில் ஆண்டுதோறும் ஓணப்பண்டிகை விமரிசையாக கொண்டாடப்படும்.

ஓணப்பண்டிகையின் முந்தின நாளான உத்திராடம் அன்றும், திருவோண தினம், அதற்கு மறுநாளான அவிட்டம் தினம் ஆகிய 3 நாட்களும் பகவதி அம்மனுக்கு ஓணப்பட்டு உடுத்தி சிறப்பு அபிஷேகங்களும், அலங்கார தீபாராதனையும் நடைபெறும்.

அதன்படி, நேற்று உத்திராட தினத்தையொட்டி அம்மனுக்கு ஓண பட்டு அணிவித்து சிறப்பு வழிபாடுகள் நடந்தன. திருவோண தினமான இன்று அதிகாலையிலேயே அம்மனுக்கு ஓண பட்டு அணிவிக்கப்பட்டு, வைர, வைடூரிய ஆபரணங்கள், வைர மூக்குத்தி சார்த்தப்பட்டன.

அம்மன் விசேஷ அலங்காரத்தில் பக்தர்களுக்கு தரிசனம் அளித்தார். அப்போது அலங்கார தீபாராதனையும் நடந்தது. முன்னதாக அம்மனுக்கு பல்வேறு அபிஷேகங்கள் செய்யப்பட்டன.

கேரளாவில் இருந்து ஏராளமான பக்தர்கள் இன்று அம்மனை தரிசிக்க வந்தனர். அவர்களுடன் உள்ளூர் பக்தர்களும் திரண்டதால் கோவிலில் கூட்டம் அலை மோதியது.

பகவதி அம்மன் கோவில் திருவோணப் பண்டிகை விழா ஏற்பாடுகளை கோவில் மேலாளர் சோணாச்சலம், தலைமை கணக்காளர் ராஜேந்திரன், கணக்கர் ஸ்ரீராமச்சந்திரன் ஆகியோர் செய்திருந்தனர்.