காரமடை அரங்கநாதர் கோவிலில் 20–ந் தேதி புரட்டாசி மாத முதல் சனிக்கிழமை விழா

கொங்குமண்டலத்து திருவரங்கம் எனப் போற்றப்படுவது காரமடை அரங்கநாதர் சுவாமி கோவில். இக்கோவில் கருவறையில் லிங்க வடிவில் வீற்றிருந்து தன்னை நாடி வரும் பக்தர்களுக்கு அருள்பாலித்து வருகிறார்.

இக்கோவிலில் ஆண்டு தோறும் புரட்டாசி சனிக்கிழமை நவராத்திரி மற்றும் விஜயதசமி விழா கோலாகலமாக கொண்டாடப்படும். இந்த ஆண்டுக்கான புரட்டாசி மாதம் முதல் சனிக்கிழமை விழா வருகிற 20–ந் தேதி தொடங்குகிறது.

23–ந் தேதி கோவிலில் முன்னோர்களை வழிபடும் மகாளய அமாவாசை சிறப்பு வழிபாடும், 25–ந் தேதி நவராத்திரி உற்சவமும், 27–ந் தேதி புரட்டாசி 2–ம் சனிக்கிழமை விழாவும், அடுத்த மாதம் 3–ந் தேதி சரஸ்வதி பூஜையும், 4–ந் தேதி 3–ம் சனிக்கிழமை, விஜயதசமி விழாவும் நடக்கிறது.

அன்று இரவு அரங்கநாதர் பெருமாள் குதிரை வாகனத் தில் எழுந்தருளி திருவீதி உலா வந்து பாரிவேட்டை மைதானத்தில் அம்பு போடுதல் நிகழ்ச்சியும், நவராத்திரி உற்சவ பூர்த்தி விழாவும் நடக்கிறது.

11–ந் தேதி புரட்டாசி நான்காம் சனிக்கிழமை விழாவும், 18–ந் தேதி புரட்டாசி ஐந்தாம் சனிக்கிழமை விழாவும் நடைபெறுகிறது.

கோவில் தக்கார், உதவி ஆணையர் ஜீவானந்தம், கோவில் செயல் அலுவலர் நந்தகுமார், கோவில் மேலாளர் ராமராஜ், மணியகார் மகேந்திரன் மற்றும் கோவில் அலுவலர்கள் விழா ஏற்பாடுகளை செய்து வருகிறார்கள்.